Ang eleksyon sa Pilipinas ay kadalasang mistulang pyesta; napakadaming nakasabit na mga makukulay na mga banderitas ng mga taong kumakandidato sa iba’t ibang posisyon sa pamahalaang lokal at nasyonal. Nariyan din ang mga maiingay ngunit nakakaaliw na mga programa sa mga miting de avance kung saan ang mga kandidato ay nag iimbita ng mga sikat na personalidad na naghahandog ng libreng awitin at sayaw upang aliwin ang mga botanteng dadalo. Subalit sa likod ng makukulay at maiingay na mga pagtatanghal na ito, nararapat nating itanong sa ating mga sarili kung hanggang kailan natin hahayaang matakpan ng aliw ang mga suliranin ng ating bansa na nangangailangan ng agarang pagtugon?