Malalim ang pagpapahalaga ng lipunang Pilipino sa esensya ng edukasyon. Ika nga ng mga kapos-palad, ito na lamang ang tanging kayamanang kailanma'y hindi maipagkakait at maipapamana sa mga anak. Bunsod nito, nagkukumahog ang mga pamilyang pagurin ang sarili mapag-aral lamang ang mga kabataan, umaasang sa pamamagitan nito ay matatamasa ang karunungang niyayabong sa loob ng silid-aralan.